Како дополнение на овие еден-на-еден консултации, тимот на консултанти/тренери организираше регионални и национални работилници и семинари за прашања кои беа од интерес на две или повеќе организации.

За време на спроведувањето на програмата, тимот на консултанти го согледа потенцијалот за понатамошен развој на своите услуги и потребата за работа на одржлива основа.

Во втората половина од 2003 година, тимот започна да работи на креирање одржлива група на консултанти/тренери. До крајот од годината сите неопходни формалности беа завршени и во почетокот на 2004 година тимот на консултанти го регистрираше здружението на граѓани КОЦКА – Мрежа на независни консултанти. Од тогаш, тимот на КОЦКА започна со давање консултантски услуги и обуки и на други клиенти.

Милиеуконтакт продолжи да ги користи услугите на КОЦКА и во нивниот следен проект што се реализираше во 2004 и 2005 година. Во негови рамки, КОЦКА им помагаше на организациите да одат еден чекор понапред во примената на вештините стекнати во претходниот период, односно да го промовираат активизмот во нивните локални заедници.

Како дополнение на директната имплементација на тренинг програмата на Милеиуконтакт, што на консултантите/тренери на КОЦКА им донесе практично искуство, тие континуирано добиваа поддршка од Милиеуконтакт за надградба на своите вештини преку учество во обуки за различни партиципативни техники за фацилитација, вештини за комуникација, кампањи, граѓански активизам и сл., спроведени од искусни меѓународни и домашни тренери.

Според евалуационите листи, кои се пополнуваат после секоја обука од страна на учесниците, евидентно е дека во последните две години КОЦКА стекна одлична репутација кај граѓанските организации и донаторската заедница во Македонија. Неколку меѓународни организации веќе покажуваат интерес за користење на услугите на КОЦКА за нивните програми во Македонија и поширокиот регион.